TO

TO
Torné Thuji
tornetuji@gmail.com

Eré, to; çéna de zolımé çévésai
Zerri, pısıke ma zerre de néverdai
Hérdise biye sıpé, yé sarri rısnai
Xaği zondané, dest u pai qeremyai

Çio bin vera çımu, yé ho wedardai
Qomi ra duri vıneta, fırni tadai
Qesé ke daivi ma, péro caverdai
Domani ve é letıké sari veng dai

Sanıké piruk u khalıku cévısnai
Yé sari qesey kerd, zoné ma némısnai
İne ki kılamé ma coru nénornai
Omedé ma é ke pıra bi, péro rıznai

Na dina de zoni yéné wedardaene
Torni ve zoné sari yéné vengdaene
Yé demé piruk u khalıku caverdaene
Sanıké zor u zexti yéné zonaene

İyé ho nézonai u qudıme şai
Domanuné qomé maré ki biye mai
Hata nıka çı dine fek ra véjiyai
Mane u mealé dine ki nézonai

To taé qesei ki goré ho vurnai
Haur nia ke, bi sevevé leq u kai
Aé ke gos da, pé sıma boyna huyai
Sıma hekmeté é qesu qe nézonai

Domané sıma ve halé ho bervéne
Der u dor, bıtuné cirani pé huyéne
Ê ke çıra huyéne, to fam nékerdéne
Ne ki rasta rast mané é qesu zonéne

Tı ke hoser biyéne, qa ho bızonéne
Sar ki mın u hora ravér né gureténe
Qa her çira ravér qimet zoné ho déne
Ewro ki zoné ma béwahir nébiyéne

A wa ke ve zoné sari, doman vengdana
Qesuné sari, nıka ana ma ra vana
Zerré ma kuno huré, gula ma zondana
Koka ma bırnena, az mara néverdana

Ma a domanu ke ho insan nézona
Her çi ra avér, cıra zon wazenu hona
Çıra niya, roc ve roc zon ra duri kona
Qéy aqıl néana, sené rae ra sona

Hundé ke Torné Thuji zoni ré wahir o
Omed qomé hora esto, cıré feciro
Bézon wesawes merde o, jéan zehiro
Pesew u perroz berveno, ve kelacéro

Maa ke; zé to, ve zoné sari, domanu veng dana

• Kamia ma, kılamuné ma de ra*