Torné Tuji-GOZE Û MURİYE

GOZE Û MURİYE
Goza qendile dare sero berreqiye
Qılancıka beleke goza kakıle diye
Erjiye ve we, hetê goze ser ceriye
Qafıkra xelesnê, fistera cı nikıliye

Qılancıka beleke eve a goze ra
Niste ve dalê de jü muriya reze ra
Nikıliya ho kuyeve goza xıze ra
Goze nalêne, "Ez mıren û na deze ra"

Muriye cêrê qılancıka beleke vero
Solê qılancıka beleke goze mewero
"Saira mı çawo qesêy kena xovero
Dı çekû vaze, qılêrê gosunê ma şero"

Qılancıke rê zof wes amê na sawda
Céré ra, çıqa destevere amê veng da
Esq û kéfê ho ra ki nat û bota vozda
Goze rê hama roşti û tijiya roz da

Goze gınê waro, serê hardê serdıni
Muriye, nımıte té, pê dalê pelgıni
"Se ho vira kenu, juya zê to rengıni
Ez to erzenu bextê Çengelê Duzgıni"

Qılancıke xêle feteliye ro goze
Peyniye de ki caverde şiye, a roze
Goze, usari biye gırs roze ve roze
Biyene gırs, ho çarnêne hetê veroze

Goze, serre ve serre qolınd û gırs biye
Hem cayê ho bi teng, hem estêne ser, şiye
Muriye; zere kerd teng, cı ra murodiye
"Mekeré rındiye, mevéné xıraviye"

Zorê xo sero vi, goze; gos pa nêkuya
Dar û berê yê dormi, ve muriye huya
"Yê zolımunê dina rê tım û tım xuya
Çı dostiya lawo, yê dine sanıka luya"

"Xırave mırê amé, kewtu haraniye
Çınayrê, kunu qılancıke vıreniye
A roza vırêne, mırê amê koraniye
Euro şiya tode, mırê mende lerziye"

"Çond hazari serra, ma serra ranêbiye
Şiya na dar û beri, boyna ma sero biye
Ma tan û tiji nê diyê" va ke muriye
"Xelas çino, hêşiriye we né dariye”
Torné Tuji -12.01.2007